Sabiwirhiji

Pindah Tugas Ninggalkeun Kamenit Keur Batur

 

 

SABADA mutasi anu dipiluan ku sawatara pejabat eselon luhur  geuningan aya nu ninggalkeun babandol pagawean anu tacan rengse. Antukna kepala anu anyar nyangking kalunggulan di eta unit kerja teu sirikna katempuhan buntut maung ceuk paribasana. Leuheung basa anu wariskeunana matak pibungaheun, lebah pagawean anu can beres 100 persen apanan  matak cacagnangkaeun. Leuheung basa lamun ukur ditinggaleun hutang, lebah lamun kabudag-badug jeung masalah hukum, apanan matak pimeniteun.

“Kumaha cenah nya Tong, sabada mutasi teh?” tanya Mang Suadma.

“Biasa wae atuh Mang, aya nu bingah margi kenging posisi jabatan  anu empuk tur merenah, aya oge nu katempuhan buntut maung alias kedah ngarengsekeun padamelan anu cacagnangkaeun. Atuda kumaha Mang, perkawis mutasi sareng promosi mah kawenangan nu gaduh kakawasaan di ieu lembur,” walon Si Otong.

“Bejana rea nu teu ngepas luyu jeung kompetensina? bener atawa enya eta teh nya Tong?” tanya Mang Suadma.

“Sanes kitu Mang, margi jumlah SKPD kawilang ngawates, ari nu hoyong seueur, atuh puguh paheula-heula norobos panginten. Anu teu walakaya mah kumaha dibabetkeunana. Naha janten setap ahli bopati atanapi dibabetkeun  ka intansi anu henteu subur,” walon Si Otong.

“Sugan aya intansi baseuh jeung garing?” Mang Suadma malik nanya.

“Tangtos aya Mang, buktosna aya nu sapertos dikandangan, buktosna ongkoh eta jalmi teh pinter tapi teu diakomodir, nya asa diteuteuinganeun, kacida nya Tong?” ceuk Mang Suadma.

“Karunya atuh ari jadi jalma keur dipercaya teh ulah sok nyangsarakeun batur, heug lamun tumiba ka dirina, apanan matak helang-heling rieut jangar (matak menit),” ceuk Mang Suadma.

“Leres upami bade diemutan mah, Mang,” jawab Si Otong.

“Omong-omong rea keneh nu ngarasa teu diuntungkeun, naha teu salah atawa bener eta teh?” tanya Mang Suadma.

“Tangtos Mang, satiap mutasi ge aya we pejabat eselon luhur anu ngaraos diteungteuinganeun. Atuda keur anteng-anteng gawe anu dipilampah kalawan daria (serius) tur taya masalah anu prinsip, teu gugur teu angin dikucek tepi ka seueur anu asa diheulang,” walon Si Otong.

“Heueuh nya Tong, ari mutasi asal kucek tur bernuansa pulitis mah gede pisan dampakna, beda jeung mutasi propesional atawa teknis tangtu moal ngahudang  pertanyaan publik. Lebah dimutasi  ninggalkeun pagawean anu  ujung-ujungna ngarempak katangtuan proyek, tah eta anu bakal ngabingungkeun  pejabat atawa Kadis anyar. Komo saupamana  eta hanca pagawean tepi ka rek tutup taun tacan rengse 100 persen. Tangtu pejabat anyar oge moal waka nampa serah terima proyek lantaran bisi keuna geutahna. Sabab teu mais teu meuleum tur teu apal mimitina, kumaha lamun aya anu ngagugat eta pagawean sacara hukum. Sabab kacida goreng patutna lamun pindah tugas ninggalkeun kamenit keur batur. Ulah kasorang kapanggih deui…” tembal Mang Suadma.(Kang Emsul)

 

 

Related Articles

Back to top button