Kuduna Partai Ngabutuhkeun Calon Ti Birokrat
MOAL lila deui bakal lumangsung Pamilukada Bupati/Walikota anu dipilampah kalawan serempak di sakuliah lemah cai. Kabejakeun masing-masing calon bupati/walikota keur berjoang pikeun meunang rekomendasi ti pimpinan partai pusat. Pon kitu diinteren partaina kawilang harengheng lantaran calon sagerbong ge parahi hayang meunang rekomendasi ti tonggoh. Katenjona sasama beus kota jiga nu akur, padahal diantara maranehanana keur silih seging sangkan meunang rekomendasi ti tonggoh (pusat).
“Jah… pulitik, kaula mah teu ngarti sapisarateun komo keur nu bodo model Mamang. Ngabandunganana oge menit, malah saditueun ti menit mending kerek di pos ronda sakalian koprek (ronda malam),” ceuk Mang Suadma.
“Mamang mah aya-aya bae, sare di pos ronda bari koprek, kukumahaan eta teh,” walon Si Otong.
“Nya heueuh atuh, mikiran pulitik mah matak jangar, ceuk Tong!” jawab Mang Suadma.
“Kunaon Mamang ngemutan pulitik sagala, anggota dewan sanes, pulitisi sanes?” tanya Si Otong.
“Tuh, nyaneh mah, ari ka aing teh nganggap sapele bae. Masing kaula tukang buburuh koprek ge kudu apal kana urusan pulitik mah, sangkan rada melek saeutik. Apanan di daerah urang ge rek aya Pamilukada Bopati lain?” tanya Mang Suadma.
“Atuh kantenan, pasareng kabupaten/kota sanes oge sami bade aya Pamilukada seremtak tea. Atuh kedah tatan-tatan urang nu janten rahayatna pikeun nyukseskeun eta pesta demokrasi teh,” jawab Si Otong
“Bener pisan maneh Tong. Kumaha perkembangan pulitik di lembur urang ayeuna?” Mang Suadma malik nanya.
“Atuh para calon bopati ayeuna nuju tihot-hat ngayakeun silaturhmi pulitik ka tiap partai sangkan kenging kendaraan kanggo nyalonkeun kapala daerah tea,” omong Si Otong,
“Ke,ke, ke, geuningan asa tibalik kadengena teh. Baruk calon bopati keur tihothat ngadeukeutan partai sangkan diusung? Kuduna mah partai anu ngabutuhkeun calon, komo lamun colonna ti birokrat, anu cerdas, kreatip, inopatip tur mibanda kapasitas, eta mah haransi moal gagal. Lamun teu nyokot calon ti birokrat anu pinter, bener, singer, nya rek neangan nu model kumaha deui?
Pangalaman gawe di birokrasi geus puluhan taun, najan PNS lain orang politik, tapi salila jadi birokrat mangpuluh-puluh taun pagilinggisik jeung urusan politik. Pasti eta birokrat leuwih ngarti kana urusan pupulitikan mah.
Salila puluhan taun icikibung di dunya pamarentah, pasti leuwih paham tibatan anggota dewan anu karek diuk 5 taun, taun hareupna eureun tina anggota dewan, cik endi nu leuwih mumpuni? Asa manglebarkeun lamun aya pejabat berpotensi teu dimanfaatkeun ku partai pulitik pikeun diusung jadi calon bopati.
Kuduna partai anu ngabutuhkeun calon ti birokrat teh, lain tibalik. Naha boga masa? Ulah hawatir, piraku salila jadi pagawe, ti ngongkoak tepi ka ngungkueuk teu boga kawawuhan, babaturan jeung wadia balad? Asa kacida, piraku, kagila-gila teuing,” ceuk Mang Suadma.(Kang Emsul)
