Nilai Goreng Gugur, Nilai Gede Tersungkur
![](https://www.kacenews.id/wp-content/uploads/2023/04/SABIWIR-HIJI-780x470.jpg)
TETELA hayang jadi panitia pemilihan teh teu sagawayah, teu kaop jalma nu atah-atah, komo bari jeung teu boga pamuntangan mah, bisa ngulumpuruk samemeh ngalengkah.
Heueuh atuda ngalengkah mah kudu kumaha, dalah geus lobi kaditu kadieu oge da lain pakarepan jalma saurang. Tapi ku pabaliutna nu baroga kapentingan dina eta pagawean, naha teu matak menit? Lain menit-menit deui, tapi saditueun ti menit nya Ka?
“Aya naon nya Tong, isuk keneh geus madungdengkeun pasualan anu teu kaharti ku Mamang? tanya Mang Suadma.
“Numawi Mang, asa sesah ngayonana. Raraosan pasaratan damel mah kedah kumaha, namun sakalieun aya kahoyong asa mararentok. Tapi ningali nu sanes mah sapertos anu pating guluyur ibarat mobil lumpat di jalan tol,” walon Si Otong.
“Maksud andika teh kumaha, kaula mah teu ngarti. Malum kaula mah teu bodo-bodo acan, sakumaha anu dicaritakeun ku andika, bating ku Mamang teu kaotakan sapisarateun,” jawab Mang Suadma, polos.
“Maksad teh kieu Mang, abdi kantos ngiringan seleksi kanggo janten panitia pemilihan. Cek rarasosan badi teh najan teu kasebut jenius ge, atuh katiasa sareng pangalaman mah teu kakantun teuing kunu sanes. Tapi lebah ngiringan seleksi mah, gagal total Mang. Namung abdi ge teu habis pikir, raraosan aya nu sahandapeun abdi tapi sapertosna teh ngaguluyur dugi ka gulna. Tah eta anu janten emutan abdi teh Mang!” ceuk Si Otong, ngabeberkeun pasualanana ka Mang Suadma.
“Oh eta… anu jadi pikiran anjeun teh? Najan Mamang lain ahli politik, kudu ngompol dina liang leutik mah biasa Mamang ge,” jawab Mang Suadma.
“Sanes eta anu dimaksad ku abdi mah, Mang. Urusan seleksi hoyong janten panitia pemilihan tea. Sanes pulutak-politik, Mang ngompol dina liang leutik,” jawab Si Otong, semu keuheul lantaran teu ditanggapi serius tea.
“Ari kitu carana mah kaula ge ngarti, samemeh andika kedal ka Mamang, jenuk beja yen anyar-anyar ieu keur ngaruruskeun sual pemelihan. Eta rek milih RT, milih RW jeung saterusna, kaula ngarti kana pamaksudan andika,” jawab Mang Suadma.
“Atuh nuhun pisah ari ngartos mah, Mang!” jawab Si Otong.
“Lain ngartos-ngantos deui keur Mamang mah. Ngan andika anu teu nga-artos meureun nya Tong? Baruk kudu nilaina hade, tapi nilai hade teu jadi jadi jaminan bakal lolos tina seleksi lanjutan. Lamun rek dipikiran matak menit, malah saditueun ti menit.
Nilai ujian gede can karuhan kapake, teu lolos ujian komo disebut belegug, tapi anu nilaina sahandapeun bisa lolos, nya rek neangan nu kumaha? Lebah nilaina goreng gugur, anu nilaina gede tersungkur, nya rek neangan nu model kumaha atuh? Lamun kitu carana mendah aya seleksi, mending juksung (nunjuk langsung) kanu boga sihung.(Kang Emsul)