Mapag Pilihan, Mutasi Pacampur Jeung Pupulitikan?
UNGGAL aya mutasi jeung promosi, pasti rea pagawe nu ngarasa diteungteuinganeun. Najan hareupeun mah muhun-muhun, mangga-mangga, padahal hatena mah asa ditujah kuda. Ngan bae teu wasa rek wakca jeung balaka teh, ngan bae matak mangaruhan kana kasumangetan kinerja. Atuda kumaha rek merenahna geura, lamun tukang rebab dititah kudu maen gendang. Pon kitu tukang bonang diparentah nabeuh goong, lebah kuduna blaktuk atawa badubangplak, ari heug teh ngeplos lantaran goong gendang iramana sewang-sewangan, ceuk paribasana.
“Jigana aya relepansina nya Tong lamun dikuat-kait jeung mekanisme penempatan birokrasi di lembur urang!” ceuk Mang Suadma, ngabalibitan.
“Tangtos aya patula-patalina eta gambaran teh atuh Mang, margi endahna wirahma ku kakompakan para nayaga tur luyu sareng kaparigelanana. Sanes dikucek tepi ka pamaenna oge ngaraos saheuhah, mana komo kanggo nu lalajo, tantos disaditueun ti menit. Kitu manawi Mang,” jawab Si Otong, rada rasional.
“Bener andika geuningan, ayeuna rada cerdas, bareto mah sumuhun dawuh bae ari kanu boga wewenang teh. Beda ayeuna mah aya heabna, Mamang mah curiga,” ceuk Mang Suadma.
“Teu kedah curiga, abdi mah ti kapungkur ge kitu, ka Mamang mah. Teu wantun nyarios soteh pedah we ka atasan bilih dipinalti,” ceuk Si Otong.
“Nya heueuh atuh ayeuna mah tarimakeun bae, da lain gawe di nenek moyang sorangan. Urang mah kumaha diaturna bae. Ngan nya kitu, ulah pedah keur boga wewenang, ulah sawenang-wenang kahayang teh. Kudu ngarampa kana hate batur, ceuk sorangan asa pangberesihna mah apanan ceuk nu sejen mah, endi atuh. Bisana rariceuw bae teh apanan balukar kabijakan anu nguntungkeun jalma saeutik. Sedengkeun rereana, naha ngarasa merenah hatena?yakin jenuk nu gugulunuk. Da ka anak jeung pamajikeunana mah cumarita panjang lebar, kitulain nya Tong?” tanya Mang Suadma.
“Ah … duka atuh, abdi mah heurin kuletah. Eta mah teu langkung Mamang, abdi mah tantos sapamadegan sakumaha anu dikedalkeun ku Mamang,” jawab Si Otong.
“Atuda kieu Tong, andika apanan apal situasi jeung kondisi kiwari. Apanan ayeuna teh mangsa mapag pilihan. Lamun nu boga wewenang teu merenahkeun jalma anu bakal dijadikeun tatapakan keur ngalengkahna engke, ayeuna pisan kasempatanana. Sabab engke mah beda deui caritana, kari prungna tarung, lain dawuhna merenahkeun jalma. Nu matak tepi ka belut buluan, salagi mapag pilihan, tangtu enggoning ngalaksanakan mutasi/rotasi jeung promosi jabatan moal lesot tina unsur pupulitikan. Najan tukang gendang kudu nabeuh saron, atawa tukang rebab kudu nabeuh goong, madia teuing. Nu penting badubangplak atawa blaktukna asal ngeunah keur sorangan. Mangsabodo masing nu maenna jeung nu lalajo ngarasa menit oge, lain urusan. Sok rek ngomong naon, Bro…?” ceuk Mang Suadma, panjang lebar.(Kang Emsul)
