Lembur Caang Ti Beurang Teu Kudu Dititipkeun
KUDUNA geus rengse numutkeun itungan mah prohram pangwangunan lembur caang ti beurang teh. Kusabab aya sawatara paktor anu ngabalukarkeun eta prohram gejed, antukna anu direncanakeun hayang lembur baranang ti peuting tacan anggeus 100 persen. Dalihna, itu tea, ieu tea, jeung sajabana. Lamun silih salahkeun bae jigana masing tepi ka belut buluan oge moal paragat (rengse).
“Saupamana eta prohram teu cucud, naha kudu mulang deui kana lampu gemblok? Moal da ieu mah prioritasna lain keur di paimahan wungkul, bisa jadi keur di pilemburan anu tadina paroek alatan tacan kasasaban ku sarana penerangan. Ngan rada aneh, eta prohram anu sakitu menggebu-gebuna ujug-ujug bejana sepi jempling badis gaang katincak, aneh nya Ka mah,!” ceuk Mang Suadma.
“Mamang nyarioskeun bae prohram lembur caang ti siang, naha teu acan rengse kitu?” tanya Si Otong, api-api (pura-pura) teu apal.
“Asa kacida, andika anu sapopoena idek liher di gedong bodas tepi ka teu apal eta prohram lembur caang ti beurang? Cik pangnanyakeun kanu berwenang atawa kanu ngokolakeunana,” omong Mang Suadma.
“Bujeng-bujeng ditaroskeun ku harkat abdi anu sanes pejabat, dalah ku wawakil urang nu aya di dewan oge, duka kumaha teu aya waleran anu jinek. Anu pasti mah, iraha-iraha bakal caraang walatra tepi ke lembur anu salingkurna. Manawi eta oge, urang mah ukur ngantosan jangji anu tos dikedalkeun ku eta pejabat,” walon Si Otong.
“Kumaha saupama eta pejabat anu ngokolakeunana pindah atawa mutasi ka unit kerja sejen, saha anu bakal neruskeunana?” tanya Mang Suadma, panasaran.
“Manawi pejabat anu enggal Mang, margi kantun neraskeun bae. Naon sesahna atuh neraskeun mah. Benten nu ngabaladah (ngamimitian), tangtos langkung abot,” jawab Si Otong.
“Beurat kumahana, perencanaana geus puguh, anggaran oge pasti aya, eta mah kari geprakna bae,” jawab Mang Suadma.
“Sumuhun kitu soteh, tapi saupamina eta prohram keuna ku hama atanapi aya nu ngarewong, tangtos serba keder. Kaditu kumaha, kadieu kumaha, antukna kumaha brengna bae, panginten,” ceuk Si Otong.
“Geuning andika jiga nu apal?” tanya Mang Suadma.
“Sanes apal Mang, eta mah panginten dikinten-kinten, duka leres atanapi teu lepat da eta mah urusan nu sanes. Apanan parantos dititipkeun eta prohram pejabat enu enggal, Mang!” jawab Si Otong.
“Heueuh …Tong, kaula ge ngarti, sual tutap titip prohram mah, ari pasualan lembur caangna ti beurang teu dititipkeun ge da geus caang ku mamaneh. Kumaha lamun anu dititipkeunana prohram caang ti peuting, tangtu matak jadi beban keur pejabat anyar. Nu ngagawenana tiheula oge boboleh, mana komo anu anyar dibabandolan eta pagawean anu kudu dibeberes jigana matak menit, malah saditueun ti menit, heueuh…?” tanya Mang Suadma.(Kang Emsul)
