Pejabat Wajib Pupulitikan Mun Hayang Diambeuan
ETAH geuning teu rame teu naha dina geprakna mah lir kadia gaang katincak, ceuk paribasana. Nu matak ulah sok waka dudah-duduh, lamun rek mutasi ulah sok rame, cenah. Ceuk Ki Dalang tea mah, golek manut maring dalang, da ari wayang mah kumaha diigelkeunana ku dalang enggoning ngalalakonkeun pamarentahan.
“Tak kitu Tong, aya dina babasan, golek manut maring dalang,” ceuk Mang Suadma.
“Mamang nuju ngadongengkeun wayang kitu? Lalakon naon anu rame danget-danget ieu? tanya Si Otong.
“Jeh…andika mah sugan teh apal, apanan tos aya guser-geser kalungguhan di lembur urang teh. Apanan ayeuna mah kapala RT sareng RW rarobah pikeun ngeusi kakosongan jabatan di eta lembaga,” tembal Mang Suadma.
“Oh… perkawis eta, uninga eta mah. Saurna jamak wae di lembur aya gusar-geser kalungguhan mah, tangtos maksadna oge kanggo penyegaran demi kamajuan daerah urang,” jawab Si Otong.
“Heueuh hade omongan maneh, bubuhan deukeut jeung bandar tea, eta jawaban teh kapake ku Mamang mah, normatip pisan. Tah nu kitu ari pagawe mah, ulah sok polos teuing, kudu saeutik diplomatis (padahal dina jero hatena lain kitu, dhoh…)!” omong Mang Suadma.
“Atuh leres Mang, ulah ngabiasakeun pasualan biasa dijantenkeun luar biasa. Sugan nembean ari mutasi teh?Apanan unggal waktos ge tiasa dilakokan luyu sareng kabutuh organisasi pamarentahan, kitu manawi Mang!” ceuk Si Otong.
“Geuningan andika ujug-ujug pinter diplomatis, boaboa-boaboa, Ka mah,” jawab Mang Suadma.
“Jih…atuh kedah aya perobahan pola pikir ayeuna mah Mang, margi danget-danget ieu kalebet taun politik,” walon Si Otong.
“Memang teu salah omongan teh, sabenerna kaula ge kitu, sapamadegan jeung andika. Berarti andika saeutik-eutikeun geus wanoh kana urusan pulitik. Sukur atuh, Mamang mah bungah nu aya lamun anjeun wanoh kana urusan pulitik teh,” jawab Mang Suadma.
“Lepat atuh Mang, pagawe ancrub kana urusan pulitik mah, tiasa dipinalti, bahaya,” walon Si Otong.
“Numatak anjeun kudu guguru ka uing, lain hartina pagawe kudu ancrub kana urusan pulitik. Lamun anjeun hayang jadi pejabat tur diperenahkeun di tempat anu stratehis wajib pupulitikan tangtu bakal diambeuan.Diambeuan kusaha atuh? Nya diambeuan ku saha bae anu merlukeun kapinteran anjeun keur kapentingan pulitik. Sabab ari kalungguhan mah aya patula-patalina jeung urusan pulitik. Urang teh ngarana oge pupulitikan, lain hartina pulitik praktis nu sabenerna. Sababari pupulitikan mah bisa enya, bisa oge bobodoan tapi bisa dijadikeun media pikeun ngahontal tujuan. Ti semet ayeuna ka hareup, pagawe atawa pejabat wajib pupulitikan lamun hayang diambeuan, kusaha bae diambeuanana mah. Jah… anjogna kana pulitik-pulitik keneh cenah, dhoh…andika mah kumaha ieu teh?” omong Mang Suadma.(Kang Emsul)
