Ditagihna Ulah di Dunya Mending Engke di Aherat
ASA cikeneh usum pilihan teh ayeuna geus mangsa pilihan deui. Atuh ti mimiti pilihan RT, RW, Kadus, Kades jeung saterusna ayeuna mimiti harengheng kawas seeng ngereng-ngereng. Kagila-gila teuing, rek pilihan naon bae ulah sok digede-gedekeun, cik kahayang teh biasa-biasa bae, montong sok haneut-haneutkeun. Kawas anu kakara bae, apanan geus biasa hirup dipilemburan milampah pesta demokrasi anu ku urang dipilampah. Ijab ti ngongkoak tepi ka ngungkueuk oge apanan kitu-kitu keneh carana milih teh.
“Aya sabaraha calon nya Tong nu rek makalangan jadi pamingpin rayat teh?” tanya Mang Suadma.
“Ari patarosan teh teu kedah nu abot-abot, nu enteng-enteng bae atuh Mang,” walon Si Otong.
“Atuh heueuh eta maksudna mah. Aya sabaraha urang kitu?” Mang Suadma, keukeuh nanya ka Si Otong.
“Manawi langkung ti hiji, tiasa janten dina geprakna mah bakal langkung seueur, margi saha jalmina nu teu hoyong janten pangagung anu sok diugung-ugung, mangga eta mah urang ningali, kumaha derna bae. Atuh abdi mah kumaha saena, abdi ngiringan bae, kumaha cek si rea,” omong Si Otong.
“Oh, heueuh nya. Kira-kita naon bae anu dibewarakeun dina kampanyena ku eta calon keur cekeleun urang atawa masarakat ka hareup?” ceuk Mang Suadma.
“Sadaya calon oge pasti sarae, Mang. Intina, sadayana oge ngaronjatkeun kamakmuran sareng karaharjaan keur sakumna rahayat,” walon Si Otong.
“Tegep atuh nya Tong. Muga-muga we anu dijangjikeun ku para kandidat bisa bukti kalawan nyata (lain bubuk roti dina mata). Eta pisan nu dipiharep ku Mamang, boa batur ge sarua. Hayang hirup subur kalawan mamur, loba duit buncir leuit, rea ketan rea keton, bro dijuru bro dipanto, ceuk cohagna. Kitu lain?” tanya Mang Suadma.
“Kantenan pisan atuh Mang, eta nu dipiharep ku urang sadaya. Sugan we kapayun Mamang teu buburuh koprek teuing. Atuh kahirupan teh rada nyenghap, teu eungap teuing sapertos nu entos-entos. Namung, kumaha Mang, upami eta anu kantos dijangjikeun teu karealisasi?” tanya Si Otong.
“Kusabab maranehana jangji, ari jangji teh hutang anu kudu dibayar, ku Mamang pasti rek ditagih. Tapi nagihna ulah didunya, enggke bae di kampung aherat. Sabab lamun ditagih ayeuna atawa ditanyakeun di dunya mah pasti jawabanana loba uget. Keuangan di lembur urang samporet tea, pon kitu sumber pendapatan sejenna teu nyumponan keur ngabeyakeun pangwangunan jeung rea-rea deui alesan. Mamang mah nagihna moal di dunya kacangkeul-cangkeul sungut, dalah didemo ge angger we dengdek, komo ditagih ku dewek. Daek salamet, ku kaula rek ditagih di aherat sabab ari jangji teh hutang, mun teru dibayar eta mah wayahna, sapa salah sapa bener bae,” omong Mang Suadma.(Kang Emsul)
