Mutasi Pulitik Vs Mutasi Propesional, Eleh Endi?
TIAP kabopaten/kota tangtu mibanda kabijakan masing-masing enggoning ngalaksanakeun mutasi jeung promosi, gumantung selera penguasa nu aya di eta daerah. Tapi nya kitu, najan kaputusan aya di pucuk pimpinan, da keukeuh kangaranana gusar-geser jabatan teu weleh mawa kareuwas, hususna keur nu rek dimutasi. Naha geuningan unggal rek aya mutasi jenuk nu ketar-ketir? Baruk ari mutasi/rotasi teh, luyu jeung kabutuhan organisasi pamarentahan, geuningan aya keneh jiganu rareuwas? Jah…, endi nu bener…!
“Sakumaha anu dikedalkeun dina pidato, mutasi atawa promosi teh eta hal biasa demi penyegaran kalawan luyu jeung kabutuhan organisasi pamarentahan. Numatak lamun aya mutasi atawa rotasi jabatan bejana ulah sok digede-gedekeun sabab ari ngamutasikeun jeung mromosikeun jabatan teh hasil kaputusan anu kudu dipertanggungjawabkeun, ceuk urang BKD tea mah,” omong Mang Suadma.
“Geuningan Mamang mah nyarios mutasi sareng promosi teh sapertos pejabat bae?” tanya Si Otong.
“Sakali-kalieun atuh Tong, Mamang ge hayang ngomong gaya pejabat. Najan purah ngendong (meuting) di pos ronda oge, nyaho ari kana nu bener mah,” jawab Mang Suadma.
“Nuhun atuh upami Mamang ngartos kana bag-bagan pamarentahan mah, abdi tiasa guguru ka Mamang,” ceuk Si Otong.
“Waduk lah, andika mah ari ka uing teh sok nganggap bodo bae,” tembal Mang Suadma.
“Upami leres Mamang uninga kana pamarentahan, hususna bag-bagan pamarentahan, abdi bade tumaros,” omong Si Otong.
“Maneh rek nanya naon, ulah ka aing urusan mutasi mah tuh ka tukangngna,” tembal Mang Suadma, ngabalicet.
“Punten ieu mah, saupamina Mamang janten bopati atanapi wali kota, naon kriteriana jalmi anu dimutasi sareng nu dipromosikeun teh?” tanya Si Otong.
“Ari nyaneh ngimpi atawa gundam sugan, nanya urusan mutasi ka uing,” walon Mang Suadma.
“Namina oge saupamina, sanes nu saleresna,” tembal Si Otong.
“Nya heueuh, urusan mutasi jeung promosi mah kumaha ceuk uing bae atuh, naha nyaneh make pipilueun sagala?” ceuk Mang Suadma.
“Mangga eta mah teu langkung Mamang, bade nyarios naon oge, bebas da teu mayar ieuh. Namina oge lalamunan, anu moal kaalaman ku Mamang, namung akibatna bakal karaos kusarerea,” ceuk Si Otong.
“Nyaneh kudu ngarti atuh Tong, ari bopati atawa walikota teh jabatan pulitik. Jadi, kabijakanana oge moal lesot tina urusan pulitik. Salawasna bakal pahareup-hareup antara mutasi politik vs mutasi propesional kira-kira ceuk nyaneh eleh endi? Tantu jawab andika jeung nu maca pasti nu eleh jalma propesional, nu meunang urursan pulitik komo ayeuna kaasup taun pulitik. Tapi ceuk kaula anu teu bodo-bodo acan kuduna mutasi pulitik vs mutasi propesional nu meunang kuduna nu propesional. Sabab anu dipiharep ku sakumna rahayat, merenahkeun pejabat dumasar kana kapasitas, kreatipitas, inopasi kalawan mibanda kompetensi,” ceuk Mang Suadma.(Kang Emsul)
