Harese Nempatkeun Pagawe Nu Gawena Hade
NGABANDUNGAN pelaksanaan mutasi jeung promosi jabatan di daerah batur lamun rek dipikiran matak kabawa menit. Malah saditueun ti menit, teuing naon istilahna. Untung eta kajadian lain di lembur sorangan, tapi di daerah sejen, mudah-mudahan gaya mutasi jeung promosi samodel kitu teu diturutan ku daerah sorangan. Lamun enya tea aya sasaruaanana jeung di lembur sorangan, eta mah meureunan kaasupna teu kahaja. Dhoh… sugan mah ngomong jeung tembok, jaaah…!
“Ari andika geus sabaraha taun nyangking kalungguhan kapala?” tanya Mang Suadma, ngamimitian.
“Duka lah Mang, matak isin nyariokeunana oge. Atuda lebah usum mutasi sok kasalip bae kunu alanyar. Antukna matak ambek nyedek, tanaga midek, bade ambek-ambek ka saha. Mana kitu oge parantos bagjaning awak bongan abdi kedah janten pagawe,” walon Si Otong, jiga nu peunggas harepan.
“Atuh andika ngalengkah kawas batur. Geuningan nu sejen, sahandapeun andika barisa, karek sataun dua taun gawe geus kabawa deui rotasi anu tempatna merenah tur tugenah,” omong Mang Suadma.
“Duka lah Mang, raraosan mah asa kedah kumaha, teu awon-awon teuing damel abdi teh. Malahan asa cape gawe teu kapake, buktina unggal usum mutasi atanapi promosi tara kacandak bae,” jawab Si Otong.
“Atuh tarekahan, piraku eleh ku batur. Komo ayeuna jaman kamajuan, ulah ngotokowo bae di gowok atuh. Apanan ari jalma teh hayang hirup nu leuwih maju ku cara nyiar elmu bari lumaku, neang luang bari leumpang. Sabab ari elmu teh datangna lain tina tuur, tapi ti pada batur. Pon kitu elmu pangaweruh lain datangna tina bincurang, tapi ti pada arurang. Kaasup hayang unggah jabatan atawa mutasi ka tempat sejen, kudu loba eksen ku cara icikibung dina jalur kakawasaan anu keur ngalalakon di eta daerah,” tembal Mang Suadma, panjang lebar.
“Leres oge nya, numawi teu aneh upami seueur nu ting terekel unggah kalungguhan ti entragan (generasi) anyar, nyalip anu senior,” jawab Si Otong.
“Nya enya atuh, Mamang mah bungah nu aya, lamun maneh aya dina kamajuan teh. Sabab nu kangaranan sukses, meureunan jaman kiwari mah kudu loba akal jeung ekolna. Karek bakal nyongcolang karierna, ulah normatip teuing ari hirup teh!,” ceuk Mang Suadma.
“Sae oge nya Mang upami abdi gayana sapertos kitu?” tanya Si Otong.
“Atuh lain alus-alus deui, bisa jadi saditueun ti alus, teuing naon istilahna. Sok komo lamun keur usum pupulitikan, urang kudu bisa ngaangklungan jeung ngagendangan anu luyu kana wirahma jeung nu boga kakawasaan. Yakin moal misleuk, dijamin sukses. Tapi nya kitu Tong, kabejakeun di lembur batur mah, anu diperenahkeun meunang jabatan kapala teh anu getol saradak suruduk atawa ajol-ajolan. Antukna pagawe anu gawena hade mah katingaleun mubus. Lebah deui sok aya nu tibalik, harese nempatkeun pagawe nu gawena hade, padahal pagawe nu boga kompetensi tur profesional jumlahna beunang diitung ku ramo. Ngan kacida hese belekena nempatkeun eta pagawe anu ceuk batur hade, tapi ceuk penentu kebijakan teu kapake. (Podonghol bae Sakadang Bangkong kaluar tina liangna) bari pok nyarita: “kurang parawantenna meureun, jalma…!” ceuk Mang Suadma niron-niron omongan Sakadang Bangkong.(Kang Emsul)
