Kabopaten Ramah Anak Nu Stunting Ngabadeg
AYEUNA mah di unggal kabopaten/kota rea nu meunang penghargaan, timimiti meunang piala juara raskin tepi ka penghargaan kabopaten ramah anak jeung rea-rea deui predikat anu kacangking ku eta daerah. Da eta mah anu katelah piala jeung penghargaan tepi ka teu kawadahan. Teuing aya sabaraha lomari meh teu kaitung eta penghargan teh atuda saking jenukna.
“Mamang mah bungah nu aya lembur sorangan meunang penghargaan teh, tandaning aya dina kamajuan dibanding lembur batur anu pialana teu pati leubeut,” ceuk Mang Suadma.
“Nyarioskeun naon Mamang teh? Leubeut ku buah naon? Apanan kembangan oge teu acan?” tanya Si Otong.
“Andika mah sok sasawangan ari nyarita teh. Kaula keur nyaritakeun hiji daerah anu leubeut ku penghargaan ti pusat, lir tingkat regional mah, geus teu kaitung,” ceuk Mang Suadma.
“Atuh sae, urang kedah sukuran dumeh kalebet daerah maju. Kitu sanes Mang?” Si Otong malik nanya.
“Eta mah rek maju rek mundur keur Mamang mah taya pangaruhna,” tembal Mang Suadma.
“Lalawora teuing ari nyarios teh Mang, bilih kapireng ku cakcak, sok aya matakna,” jawab Si Otong.
“Madia teuing, rek kadengeeun ku cakcak atawa ku toke, da kaula mah angger purah nungguan gardu (pos ronda). Nu matak masing aya penghargaan naon bae oge keur Mamang mah biasa-biasa bae, angger jadi komandan koprek,”omong Mang Suadma.
“Sanaos kitu, tetep urang kedah ngaraos reueus, upami lembur katotol punjul dina saniskara widang program pangwangunan. Ari kahayong Mamang kedah kumaha supados eta penghargaan teu matak jadi basa,” ceuk Si Otong.
“Kaula rek nanya ka anjeun, ongkoh loba penghargaan tapi buktina geuningan geseh alias teu luyu jeung kaayaan di lapangan? tanya Mang Suadma.
“Lebah mana teu luyuna Mang? Apanan aya buktosna, moal pati-pati kenging penghargaan atanapi piala upami teu luyu sareng buktosna di lapangan. Sok, Mamang bade nyarios naon deui?” ceuk Si Otong, semu nangtang.
“Jeh… geuning andika ngahualkeun ka kolot. Sabenerna uing teh titadi mikiran maneh, ongkoh katelahna kabopaten ramah anak, sayang anak, jeung rea-rea deui nu mawa-mawa istilah anak, geuningan di sawatara desa/kacamatan ngabadeg keneh budak kuntet. Ceuk istilah kasehatan mah stunting (gagal tumbuh/kerdil) tepi ka jumlahna ngabadeg malah ngarewu. Asa teu petuk jeung hate ka mah, ongkoh kabopaten ramah anak, tapi penyandang stunting sakitu ngabadegna! Ongkoh kabopaten pendidikan, tapi nu teu kabual neruskeun sakola jenuk keneh. Sarua jeung budak diayun ambing tur dinangna-nengne, tapi ahirna dibeubeutkeun, kumaha ieu teh? Dhoh… sugan mah!” ceuk Mang Suadma.(Kang Emsul)
