Ngudag Haliah Dunya Beuki Tambah Menit
ANYAR-anyar ieu Si Otong jarang panggih jeung Mang Suadma, teuing keur kamana. Tapi ari beja ngaliwatan HP mah kakapeungan nyaut, ngan duka posisina keur dimana-mana mah. Cenah jeung baruk, Si Otong keur usaha satekah polah hayang jadi itu, hayang meunang ieu, pikeun ngarobah nasib ka hareup nu leuwih onjoy ti batur. Dina hiji mangsa Si Otong aprok jeung Mang Suadma, atuh puguh matak sono sakalangkung aya batur ngobrol padungdengan sakumaha biasa dipilampah samemehna.
“Kandi bae nya Tong, asa geus lila teu panggih jeung anjeun sugan keur aya nu dipuhit (dipenta tur dipilampah)?” tanya Mang Suadma, bangun sono.
“Numawi Mang, abdi teh hoyong ngarobah nasib nu langkung sae ti ayeuna. Margi upami teu diihtiaran ti kiwari, ku cara satekah polah tiasa kalindes batur,” jawab Si Otong.
“Ari ngomong teh tara-tara tisasari, nya luhur-luhur teuing. Apanan andika teh kudu kumaha, beubeunangan nu ayeuna ga moal heueuh kahakan kabeh,” omong Mang Suadma.
“Ari Mamang, apanan urang teh kedah ngarobih nasib, piraku angger keneh bae kieu?” tanya Si Otomg.
“Kieu-kieu kumaha andika teh, sukuri wae atuh nu aya, anu katarima ayeuna tur gawean anu bener. Ari gawe bener mah, komo lamun pagawean urang karasa pisan mangpaatna ku rahayat. Tangtu bakal mawa kana kajembaran jeung katenangan hirup, ulah sok ngawang-ngawang kahayang teh bari jeung anu can karuhan kahontal atawa katedunan,” omong Mang Suadma, panjang lebar.
“Kumaha maksadna Mamang teh, abdina kedah cicing bae dienggon?” Si Otong malik nanya.
“Lain kitu astahiam, ihtiar mah angger ngan kudu luyu jeung papagon agama. Apanan karasa ayeuna ku andika oge, hayuh ngudag-ngudag urusan kadunyaan bari jeung anu karasa mah nambahan kabingung. Kitu lain?” tanya Mang Suadma.
“Etah geuning leres pisan Mang! Abdi rumah danget-danget ieu keur seueur kapaur sareng kahariwang, inggis alahbatan maut hinis, rempan alahbatan maut pedang, ceuk paripaosna. Da nu aya teh paur sareng paur bae bilih posisi abdi teu sapagodos sareng kahoyong abdi,” jawab Si Otong, semu ngalengis.
“Heh…Tong, andika ngudag haliah dunya bae mah lain meunang katenangan, malah beuki tambah menit. Beda deui pikeun jalma anu salawasna ngaheulakeun urusan aherat hirupna bakal leuwih tenang tur aya dina kucuran rohmat. Sabab lamun ngudag-ngudag bae urusan dunya moal aya seubeuhna, boga dua deupa hayang tilu deupa jeung saterusna. Beda deui jeung jalma anu ngudag kabagjaan tur kasalametan aherat, bisa sukses duanana, nya sukses dunyana sumawona aheratna. Ceuk Mama Ajengan, lamun urang ngudag-ngudag bae urusan dunya, urusan aherat bakal kakantun. Sabalikna, lamun urang ngudag urusan aherat, urusan dunya bakal kabantun. Atuh contona, lamun melak jukut moal aya pare. Tapi lamun melak pare, pasti jukut ge bakal jadi.(Kang Emsul)
