Kaberhasilan Prohram Pangwangunan Meunang Gawe Babarengan
NGAKU asa pangpinterna tur ngarasa pangdeukeutna jeung dunungan antukna gede hulu. Najan kitu, urang teu bisa hirup sorangan, angger merlukeun nu sejen enggoning milampah hiji program pangwangunan. Najan kasebutna mobil impala (kendaraan pangalusna baheula) masing mesinna hebatna, lebah banna kempes mah moal bisa lumpat. Pon kitu banna lengkep tapi pentilna teu berpungsi, sarua jeung hitut da angger wae eta kendaraan mewah teh bakal numpra.
“Numatak ulah edeg masing sakumaha ngarasa panghebatna oge ari tanpa pangrojong pagawe sejen atawa SKPD lain, yakin moal jalan masing boga prohram salangit oge. Kitu lain nya, Tong?” tanya Mang Suadma.
“Perkawis naon tea Mang, jol-jol nyarios program salangit sagala. Kumaha maksadna?” Si Otong malik nanya.
“Jeh…andika mah, ari diajak ngobrol serius teh sok api-api (pura-pura) bodo,” ceuk Mang Suadma.
“Rumaos abdi mah kirang paham kana anu dicarioskeun ku Mamang teh. Hapunten sanes ngalalaworakeun patarosan,” walon Si otong.
“Maksud Mamang mah kieu, lamun andika kaparengkeun boga kalungguhan peupeujeuh ulah nganggap sapele atawa mandang enteng ka sakumaha pagawe atawa SKPD anu sabeungkeutan sajeroning ngalaksanakeun sarupaning prohram pangwangunan. Masing anjeun pinter bisa nurus bumi, ngapak mega, ceuk paribasana, najan ngahontal kaberhasilan lain meunang sorangan, tapi hasil kerja kolektip (babarengan),” omong Mang Suadma.
“Oh…eta anu dimaksad ku Mamang teh, ari kitu abdi kedah kumaha nya Mang. Margi suksesna hiji program dumasar kana hasil padamelan tim, sanes hasil perorangan. Kitu manawi Mang, hapunten,” walon Si Otong.
“Dihampura pisan, sukur ari maneh boga pamadegan kitu mah da memang kitu sakuduna. Ulah asa aing uyah kidul, nulak cangkeng dina punduk, kabatur nganggap euweuh nanaonanna. Peupeujeuh ulah kitu. Apanan kasebutna mobil mewah oge ari nu dianggap leutik (pentil) tapi teu berpungsi apanan eta kandaraan moal bisa jalan,” tembal Mang Suadma, panjang lebar.
“Amit-amit Mang, ulah kasorang kapanggih ku anak incu gaduh tabeat atanapi laku lampah sapertos kitu,” jawab Si Otong.
“Sukur atuh berarti andika eling keneh, sabab dijaman kiwarirea jalma ngarasa dirileuwih pinter ti batur. Sugan ari majuna hiji lembur teh cukup ku lima urang atawa cukup dikokolakeun ku lima SKPD. Sakabeh pagawe atawa sakumna SKPD nu aya di ieu lembur sarua milu andil kana kamajuan nagara. Ibarat nikmatna cai kopi, pedah aya gula, kopi tur ditinyuh ku cai panas, karek disebut mantap rasana. Tapi lamun dibaheuman bae kopina asa teu empan, pon kitu nguyupan cai panasna bae matak momod, nya kitu ngabaheuman gulana bae matak sariawan. Tapi lamun diseduh, aya kopina, ditambah gula tur ditinyuhna ku cai panas, apanan matak edotna karasana (kacida nikmatna).Ngan nya kitu, lebah rasana enak nu kasebut ukur kopina bae, mantap cenah. Lebah aya masalah anu dituduh gara-gara gula baruk teh, teu adil atuh,” ceuk Mang Suadma.(Kang Emsul)
