Tunda Bayar, Geus Kabayar, Rugi Bandar
DIKIRA ukur para intelektual wungkul anu arapaleun sual tunda bayar di lembur urang teh. Geuningan di warung pecel (lotek) oge sawatara masarakat awam anu rek meuli pecel nyaritakeun gagal bayar jeung tunda bayar nu kajadiananadi kabopaten sejen. Ngan bae cenah, gagal bayar di lembur batur mah teu pati ibur kawas di lembur sorangan. Malahan tatangga Mang Suadma, kayaning Mang Jono, sempet mere pencerahan kanu mareuli pecel kuayana tunda bayar anu kiwari jadi kacapangan sabiwir hiji (piral).
“Alhamdulillah…Mang, boh sakitu boh sakieu, abdi parantos nampi tina tunda bayar teh,” ceuk Si Otong.
“Sukur atuh, ari geus nampa mah, lumayan keur nyumponan sarupaning pangabutuh sapopoe,” tembal Mang Suadma.
“Namung nya kitu Mang, kangaranan artos, kenging sakitu seep, kenging sakieu kirang keneh. Asa kedah kumaha ngokolakeun pangasilan teh, seueur keneh anu teu acan katutupan,” walon Si Otong.
“Andika kudu sukuran, narima sakitu oge geus untung, tibatan teu dibayar pisan mah komo, apanan matak ticengklak,” tembal Mang Suadma.
“Leres pisan nya Mang, urang mah kedah nampi kana kaayaan, malah kudu sukuran dumeh tunda bayar sawareh tos kabayar,” omong Si Otong.
“Heueuh lebah can dibayar mah mani saheng laporan kaditu, bebeja kadieu, Mamang ge kabawa rudet. Pagawe lain, naon lain, Mamang mah. Lebah geus calair teu embut teu renghap, kilang bara inget ka Mamang mah, keur meuli-meuli bako sebul. Bohong ketang, Mamang mah sisiwo, lain hayang dibere, tapi mun aya nu rido moal nutup panto sempit,” ceuk Mang Suadma.
“Geuningan Mamang nyarisona rada diplomatis, ongkoh heureuy alim nyuhunkeun, namung upami aya nu rido, moal nutup panto sempit. Kumaha maksadna eta teh?” Si Otong malik nanya.
“Andika mah kudu disundakeun bae, kudu ngarti bae atuh Bro…! Bohong ketang,” omong Mang Suadma.
“Mangga atuh Mang, abdi ge gaduh kanggo meser bako sagalempeng bae mah,” tembal Si Otong.
“Bohon Tong, lain kitu, Mamang mah. Ukur mangkarunyakeun kanu ngokolakeun tunda bayar. Baruk numutkeun catetan anu kudu dibayar jumlahna ngehontal 94 Meter, tapi saprak dilaksanakeun lain sakitu jumlahna teh, bejana ngabeukahan jadi 100 Meter leuwih. Eta teh kumaha cara ngitungna, meureunan bisana kajadian gagal bayar akibat tina salah ngitung (mengpar tina prediksi awal), komo lamun ngitungna ukur sorangan. Dihawatirkeun ku Mamang, anu ngokolakeun tunda bayar, ayeuna sawareh geus kabayar, tapi ujung-ujungna rugi bandar. Nya rek kumaha pakarepanana lamun tina tunda bayar, geus kabayar antukna rugi bandar. Ulah kajadian seperti kitu, sabab bakal nimbulkeun masalah anyar, gagal bayar jilid dua,” ceuk Mang Suadma.(Kang Emsul)
